الخيبه لها أوجه عديدة.......!!!!

السلام عليكم ورحمة الله وبركاته
اخوانى الاعزاء........
اليوم يا احبائى ساحكى قصة وهى قصة ليست لها مثيل.........
كان يا ما كان يا سعد يا اكرام ......... كانت فى دوله قصدى حارة ((الغلابة والمطحونين)) كان فيه شعب قصدى ناس غلابه عاديين وكانت فيه شله من اصحاب كويسين كروشهم مليانه من عرق الغلبنين.........الشله دى كان ريسهم اسمه الشاطر ((حسنى)) وصاحبه الانتيخ قصدى الانتيم اسمه ((نظيف)) لانه كان بينظف جيوب الغلابه بدرى بدرى .......وبرضه من الشله واحد اسمه ((سرور موافقة)) دائما كان يوافق على اى حاجه يقولها رئيس الشله.... وكانت الشله دى كبيره جدا فيها زيد وعبيد وغيره..... المشكله كلها كله عايز يتقرب من ريس الشله((حسنى)) طيب يعملوا ايه؟؟!!....... فخرج واحد اسمه((بطرس)) المسئول عن الماليه قصدى مصروف الشله الكبيره طيب يعمل ايه فكر شويه الواد اللى اسمه بطرس ازاى يبسط الريس والشله ويبسط شعب ((الغلابه والمطحونين)) المهم قال يبص على مصروف الشله قد ايه ويا عيبنى ملاقش الا شوية ملايين ......قصدى ملاليم على قد الكف ......قال ((لأ .....مش ممكن اصرف فلوس زياده على شعب الغلابه والمطحونين ....لازم افكر ازاى ازود مصروف الشله من الناس الغلابه وفى نفس الوقت احسن معيشة الناس الغلابه))..........
المهم مرت الايام من حبك وتخطيط واعداد من اجل المفاجاة الكبيره.......قعد الريس مع الشله الكبيره وفكر معهم وسبحان الله سبحان الله كان الريس بيفكر فى زيادة مصروف الشله الكبيره فقام الواد اللى اسمه ((بطرس)) وكان معروف عنه انه غالى..........فقال ((يا ريس لقيتها احنا نستعبط على شعب الغلابه والمطحونين نديهم باليمين وناخذ بالشمال)) .............
رد الريس وهو مهموم وحزين((طيب قولى ازاى يا فالح))
فرد عليه بطرس وهو نافخ صدره(( يا ريس هنطلع قانون قصدى اتاوة جديده من خلال زيادة الضرائب قصدى اتاوة البلطجه على جميع المساكن العقاريه قصدى العشش.....))
قاطعه الريس وقال((ايه يا بنى كل مرة تقولى قصدك .......قصدك خليك كده صاحب شفافيه يييييييه عدتنى قصدى تكون واضح وصريح يا بنى الشفافيه لها انياب كمل يا بنى يا بطرس ربنا يخليك لينا...... بس خد فى بالك عايزين نبسط الشعب مش كل حاجه هات وهات.......))
رد بطرس وقال(( ياريس انا مش عايزك تقلق ابدا وسبنى اكملك المفاجاه الكبيره احنا هنخلى الخطة محبوكه ونطلع قانون جديد اسمه اعفاء من الاتاوة بس طبعا مش على كله احنا مش عايزين نطلع من الموضوع بلاحمص هنخلى الاعفاء على سكان المقابر.........!!!))
قام الريس والشله وبما فيهم الاخ ((حبيب)) ريس البلطجيه وصفقوا بحرارة للواد بطرس ومن يوميها بطرس اصبح حبيب الريس وتحت باطه و بطرس بصراحه مش مصدق وفرح جدا...........
المهم مرت الايام والشعب الغلبان زى كل يوم رايح على الشغل مطحون وراجع للعشه بتعته مكسور المهم واحد من المواطنين المطحونين بيفتح صك الفرمان الصباحى وبيقول(( يافتاح يا عليم يا رزاق ياكريم)) وفجاة وقع عينه على الفرمان الجديد((القانون الجديد)) وكان حظ المواطن ده انه من سكان المقابر وما كدش الفرحه سيعاه فضل ينط ويجرى ويقول ((بركاتك يا حكومه))..........
وفضل سكان المقابر عيشين فى سعادة وفرحه وبقية الشعب اصحاب العشش عيشين فى غم وحزن حتى ان سكان العشش بيحسدوا سكان المقابر على اعفاءهم من الاتاوة...........
مرت الايام على هذا الحل الذى كان من المحال..........
وفى يوم من الايام مر مواطن من سكان المقابر حزين ومهموم على واحد من سكان العشش فاستغرب سا كن العشه ((ايوة يا عم محدش قدك عايش فى نعيم ولكن غريبه انت مالك مهموم اوى يكون ام اوياء طلعتلك من قبرها.......))
رد ساكن المقابر وقال(( قركم جابنا الى وره امبارح جالى بلطجى من الشله اياها معاه شومة الاتاوة وقال ((يتدفع يا تنطرد)) رد ساكن المقابر قاله ((ايه..... ريس الشله ادى اعفاء من الاتاوة على المقابر)) قال البلطجى وعينه بطق شرار(( نعم يا اخوى انت ما كملتش بقى قراءة القانون ان الميتين ملهمش اعفاء من الاتاوة وانت حضرتك قريب الميت المدفون عندك لازم تدفع)) قال ساكن المقابر ((يا ولاد الايه........)) قله البلطجى ((نعم يا روح......)) قاله ساكن المقبره(( معلش يا باشا مقصدش)) ودفعت كل اللى حلتى وبقيت على البلاطه.......))
رد عليه سا كن العشش ومش عارف يمسك نفسه من الضحك((هههههههههههههمش قولتلك هههههههه الخيبه لها اوجه عديدة))
توته توته خلصت الحدوته حلوة ولا ملتوته........!!!