سلسلة السيرة النبوية ( كل ما يخصها )

الجزء الأول

الحمد لله والصلاة والسلام على خير خلق الله

اما بعد

باذن الله اليوم هنتكلم عن موضوع من اهم الموضوعات في حياتنا

يا ترى مين قدوتك؟!

صعب جدا ان يكون انسان في الدنيا مالوش قدوة بيقلده

لان الانسان اجتماعي بطبيعته

وأي انسان مهما كان هتلاقيه بيقلد حد في في أخلاقه في طريقة مشيته في أي جانب من جوانب حياته

وده مش عيب أبداً في أي حد انه يكون ليه قدوة بيقلده

لما تلاقي مذيع يسال لاعب كورة يقول له مين مثلك الاعلى

يقوله محليا ابو تريكة مثلا وعالميا رونالدينهو

وكل الدنيا كده الممثلين والمغنيين والمصارعين ولاعبو الكراتيه

كلهم ليهم مثل اعلى

فيا ترى مين مثلك الاعلى

عندنا حاجة مهمة جدا قبل متجاوب

مهمة جدا جدا

اختار لنفسك قبل متجاوب

اختار لنفسك مكان

لان الاسم اللي انت هتجاوب بيه كمثل اعلى ليك

هتكون معاه يوم القيامة

ايديكم في ايدين بعض

مكان ميروح هتروح معاه

ركز بئا وقول

تحب تكون مع مين في يوم القيامةفكر

المغنى العالمي صاحب الشعر المنكوش
ولا الراقصة اللولبية لوزة مهلبية
ولا المصارع الجبار اللي صدره زي صدر الحمار

ولا مين ولا مين ولا مين

مين يشرفك تكون ايدك في ايده ؟

مين يسرك انك تروح معاه؟

مين لما تتزنق وتتمنى حد يشفع لك عند ربك يكون معاك؟

ويشفع لك في يوم لا ينفع فيه مال ولا بنون

الا من اتى الله بقلب سليم

تعرف ؟

هاقولك على حكاية صغيرة كلنا محتاجينها

بيحكيها لنا سيدنا انس خادم الرسول صلى الله عليه وسلم

جاء رجل الى رسول الله صلى الله عليه وسلم

وقال له يا رسول الله اني احب القوم ولا اعمل بعملهم

قال ( انت مع من احببت )

فقال انس والله ما فرحنا بشئ بعد الاسلام فرحنا بهذا الحديث

عارفين ده معناه ايه!

ان لو مثلك الاعلى ناس اتفوقت عليك في العمل لله

برضه هتحشر معاهم

ولا يوجد من يشرفنا ان نكون في جواره وبين يديه يوم القيامة

اعظم ولا افضل ولا احب من حبيبنا سيد ولد ادم حبيب الحق سيدنا محمد صلى الله عليه وسلم

ولا بد لاي حد بيحب حد انه يتكلم عنه كتير ويعرف عنه كتير ويسال عنه كتير

فإن شاء الله هيكون لينا موضوعات متتالية نتعرف فيها بكل بساطة على مين هذا النبى الكريم اللي ربنا شرفنا بيه

ورفع قدرنا بالانتساب لامته

وهيكون لينا بإذن الله الشرف العظيم ان اول من يدخل الجنة هو سيدنا محمد

واول امة هتدخل الجنة هي امة سيدنا محمد صلى الله عليه وسلم

الجزء الثاني

بسم الله الرحمن الرحيم

الحمد لله والصلاة والسلام على رسول الله

اما بعد

اتكلمنا في المرة اللي فاتت عن اهمية القدوة وضرورة التركيز كتير جدا في اجابة السؤال ده لان ببساطة اللي انت عامله قدوتك هيكون قائد ليك يوم القيامة

واتفقنا ان لا يوجد انسان في الكون نتمنى اننا نكون معاه وبقربه يوم القيامة اكتر من سيدنا محمد صلى الله عليه وسلم

وسؤال النهارده

ليه قدوتنا تكون سيدنا محمد صلى الله عليه وسلم؟

والحقيقة السؤال ده سهل جدا وصعب جدا!!

سهل لان فعلا لا يوجد أي حد في الدنيا الا وفيه نقص معين فانت ممكن تقتدي بيه في موقف ومتقتديش بيه في موقف تاني إلا سيدنا محمد صلى الله عليه وسلم

وصعب جدا لان اكبر صعوبة تواجهك انك لما تتكلم عن جوانب العظمة في شخصية سيدنا محمد صلى الله عليه وسلم والله هتتعب

جدا ومش هتعرف تبدا منين ولا

تقول ايه

عادة أي عظيم من العظماء ممكن تظهر عظمته في موضوع او في جانب معين من جوانب الحياة

نيوتن كان بارع في الفيزياء بس هل كان قائد عسكرى ؟ هل كان شخصية اجتماعية مؤثرة في الناس ؟ هل كان له فكر معين ورثه لغيره وربى جيل عليه وحملوا

الراية من بعده ؟ هل كان ناجح في علاقتة الاسرية والعائلية ؟ هل كان اب ناجح وزوج ناجح ؟

ونفس المثال ينطبق على ارسطو وفيثاغورث واينشتاين ونابليون وغيرهم

انما كانت اكبر عظمة في شخصية سيدنا محمد صلى الله عليه وسلم هي تكامل جوانب عظمته في كل النواحي

رجل نجح في كل الميادين

في كل شئ عمله نجح فيه

وعشان كده لما يقابلك أي موقف في حياتك واحترت تاخد قرار ايه في الموقف ده

سبحان الله هتلاقي في سيرة سيدنا محمد صلى الله عليه وسلم موقف مشابه له واخد فيه قرار

وهتتعجب ازاي عاش كل ده وعاش كل التجارب اللي زي دي

عشان كل مسلم من بعده لما يعيش تجربة وعاوز ينجح فيها لازم يبص دايما على تجربة سيدنا محمد صلى الله عليه وسلم

ولو حبينا نقول باختصار لان ده هيكون موضوع طوييييييييييييييييل بيننا ان شاء الله

هو كان - صلى الله عليه وسلم - طفل صغير اتولد في بيئة صحراوية بيئة بعيدة تماما عن العلم

اتولد سيدنا النبي يتيم الاب وبعد ست سنين ماتت الام كمان وبعد سنتين مات الجد اللي كان بيعطف عليه في بيئة قاسية جدا

كان ايه اللي متصور من أي إانسان تاني بظروفه دي

كان ممكن يطلع ناقم على الدنيا كلها كئيب متشائم يعاني من الفشل في كل اموره مدمر لنفسه ولمجتمعه -بس ده لو كان إنسان تاني غير النبي صلى الله عليه وسلم

كان- صلى الله عليه وسلم- يعيش مع عمه في فقر شديد وعمه كان عنده ولاد كتير ومال قليل فقرر انه ميكونش عالة على عمه ونزل يشتغل في سن مبكرة جداً وهوا

لم يكمل عشر سنين

تصوروا كده حد تاني كان ممكن يكون ايه بعد الفقر الشديد ده والمعاناة في الطفولة دي

كان ممكن يكون جشع للمال عايز يجمعه باي شكل وباي تمن ومن أي طريق المهم يكون من اغنى الاغنياء ويخلى الناس اللى ادامه دول عبيد عنده - بس ده برده لو

كان حد تاني غيره صلى الله عليه وسلم

بعد كده اشتغل في مال سيدة أرملة من أكابر اهل بلده

اظن أي حد تاني في مكانه وباللي جراله في عمره كان ممكن يعمل ايه

واظن دي مش محتاجة توضيح

طلع- صلى الله عليه وسلم -بره بلده واشتغل وانتو عارفين إن اخلاق بعض الناس بتتغير حسب المكان فممكن وانت في بلدك ووسط

اهلك تكون مضطر لتصرفات معينة وأخلاق معينة ولما تسافر أو تروح أي مكان تاني تلاقي الأخلاق اتغيرت واتبدلت وظهرت الحقايق واسألوا تايلاند وجزر هاواي

عاش شبابه - صلى الله عليه وسلم - في بلد مفيهاش عيب ولا حرام اللي نفسه في حاجة بيعملها

خمرة موجودة ليل نهار وبيوت مشبوهة والعجيب انها برضه مش عيب وكانوا بيحطوا عليها راية حمرا عشان تتعرف بينهم ان البيت ده من البيوت المشبوهة

واظن شاب في ظروف زي دي في الوقت اللي كان فيه ده مش معاه امكانيات للجواز ولا باين ان فيه امل حتى في الجواز من الفقر الشديد وانه يتيم الابوين اظن كان

مكانه الطبيعي البيوت دي ويشرب عشان ينسى

مش بقولكم الواحد لو حب يتكلم عن عظمة شخصيته - صلى الله عليه وسلم - يتكلم عن ايه ويسيب ايه

اتجوز -صلى الله عليه و سلم - السيدة الغنية - وهي ستنا خديجة بنت خويلد رضي الله عنها -

وكانت اكبر منه واظن كل الناس ممكن تقول عن شاب يتجوز سيدة غنية وكبيرة وارملة مرتين وعندها اولاد من اجوازها الاتنين يعيش معاها اد ايه ويخلص لها اد

ايه وميعرفش عليها ست تانية لا جواز ولا غير جواز

تخيلوا انه -صلى الله عليه وسلم - يقعد معاها -رضي الله عنها -25 سنة ميعرفش غيرها 25 سنة كان وصل عمره فيها للخمسين

ومتجوزش عليها ولا عرف واحدة غيرها وكان أصلا عمرها - رضي الله عنها -يوم متجوزها كان 40 سنة ووصلت بعد ال 25

سنة دول لسن 65 سنة

واظن انتوا فاهمين اللي ممكن يعمله زوج شاب لزوجة غنية اكبر منه وازاي يبرر لنفسه أي تصرف - بس ده لو كان حد تاني غير نبينا صلى الله عليه وسلم

ازاي بيقضي فترة شبابه -صلى الله عليه وسلم - وزهرة عمره مع سيدة كبيرة

و عاش معاها - رضي الله عنها - 25 سنة وماتت وهوا في الخمسين من عمره

سبحان الله

ما أعظمها من شخصية

مش قلتلكم جوانب العظمة كتير جدا [/color]